Die Nag van God se Oordele

Johan Malan - Afrikaanse Artikels

Opsomming: Tye van goddelike oordele word altyd in die Bybel as ‘n donker tyd beskryf.

Vir Christene is daar profeties goeie nuus want die Here kom ons haal. Vir die ongeredde wêreld wag daar die nag van God se oordele in die verdrukking.

“Wagter, hoe ver is die nag? Die wagter sê: Die môre kom, en ook die nag” (Jes. 21:11-12).

Wat die profesieë oor die eindtyd betref, is dit duidelik dat daar vir sommige mense ‘n nuwe môre gaan aanbreek, terwyl dit vir baie ander nag gaan word. Vir die Christene breek daar ná die wegraping ‘n nuwe dag in die teenwoordigheid van die Here aan. Dit sal op die duisendjarige vrederyk op aarde uitloop, wanneer die lig van God se geopenbaarde koninkryk met Christus as Koning, die hele aarde sal verlig.

Vir die sondaars gaan dit egter nag word. Ná die wegraping sal die Christene, wat geestelik gesproke die lig van die wêreld was, skielik weg wees. Dan sal die uur van die duisternis op aarde aanbreek en die koninkryk van die Antichris geopenbaar word. Ná ‘n valse vrede van 3½ jaar sal daar ‘n groot verdrukking van nog 3½ jaar aanbreek, waartydens die oordele van God oor die wêreld uitgestort sal word. Dit sal ‘n tyd van groot duisternis en benoudheid wees:

“En in dié dag sal dit oor hulle dreun soos die gedreun van die see. As iemand die aarde aanskou, kyk, daar is angsvolle duisternis" (Jes. 5:30).

“'n Dag van duisternis en donkerheid, 'n dag van wolke en wolkenag… Die son sal verander word in duisternis en die maan in bloed, voordat die groot en deurlugtige dag van die Here kom” (Joël 2:2, 31).

“Wee die wat na die dag van die Here verlang! Wat sal tog die dag van die Here vir julle wees? … Is die dag van die Here nie duisternis en geen lig nie, ja, donkerheid sonder 'n ligstraal?” (Amos 5:18, 20).

“Dié dag is 'n dag van grimmigheid, 'n dag van benoudheid, 'n dag van benoudheid en angs, 'n dag van woestheid en verwoesting, 'n dag van duisternis en donkerheid, 'n dag van wolke en wolkenag” (Sef. 1:15).

“Ja, ek sal die mense uitroei van die aardbodem af weg, spreek die Here” (Sef. 1:3).

Hierdie oordele van die dag van die Here sal in die eindtyd, nét voor die wederkoms van Christus, plaasvind. Dan sal groot duisternis en benoudheid skielik op die aarde toesak. Oor dié tyd het die Here Jesus gesê:

“Want dan sal daar groot verdrukking wees soos daar van die begin van die wêreld af tot nou toe nie gewees het en ook nooit sal wees nie. En as daardie dae nie verkort was nie, sou geen vlees gered word nie… En dadelik ná die verdrukking van daardie dae sal die son verduister word, en die maan sal sy glans nie gee nie, en die sterre van die hemel val, en die kragte van die hemele sal geskud word. En dan sal die teken van die Seun van die mens in die hemel verskyn, en dan sal al die stamme van die aarde rou bedryf en die Seun van die mens sien kom op die wolke van die hemel met groot krag en heerlikheid” (Matt. 24:21-22, 29-30).

Hieruit blyk dit onteenseglik dat die oordele van die dag van die Here in die eindtyd plaasvind – nét voor die wederkoms van Christus.

Toe die Christene van die vroeë Christelike kerk erg in die Romeinse Ryk vervolg is, het hulle gedink dat die dag van die Here aangebreek het. Paulus sê egter in 2 Thessalonicense 2 vir hulle dat die dag van die Here nog nie aangebreek het nie omdat die Antichris, as die mens van sonde, nog nie geopenbaar is nie.

In 95 n.C. het Johannes visioene oor die eindtyd gesien waarin baie besonderhede oor die geweldige oordele en rampe van die dag van die Here in die groot verdrukking gegee word (Op. 6:12-17; 16:1-21).

Is hierdie oordele ook vir die Christene bedoel? Nee! Ons is nie vir die oordele en toorn van God bestem nie (1 Thess. 5:9), net soos wat Noag en Lot ook nie daarvoor bestem was nie. Vir ons kom nie die nag nie, maar die môre wanneer ons in die persoonlike teenwoordigheid van die Here Jesus sal wees (Luk. 21:36).

Aan die einde van die groot verdrukking sal ons saam met Christus terugkom wanneer Hy die magte van die duisternis sal verdelg om die koninkryk van die lig op aarde te vestig. Ná die duisternis van die groot verdrukking sal die lig van die vrederyk helder verrys met Jerusalem as die hoofstad van die wêreld, daarom sê die Here vir Jerusalem en sy inwoners:

“Staan op, word verlig; want jou lig kom, en die heerlikheid van die Here gaan oor jou op. Want kyk, die duisternis sal die aarde oordek en donkerheid die volke; maar oor jou sal Here opgaan, en sy heerlikheid sal oor jou gesien word. En nasies sal trek na jou lig, en konings na jou stralende opgang" (Jes. 60:1-3).

Die regverdiges wandel in die lig omdat hulle deur die wedergeboorte kinders van die lig is:

“Want vroeër was julle duisternis, maar nou is julle lig in die Here – wandel soos kinders van die lig” (Ef. 5:8).

“Terwyl die pad van die regverdige is soos die lig van die môreglans, wat al helderder word tot die volle dag toe, is die weg van die goddelose soos duisternis: hulle weet nie waaroor hulle sal struikel nie” (Spr. 4:18-19).

“Ons moet die deugde verkondig van Hom wat ons uit die duisternis geroep het tot sy wonderbare lig” (1 Pet. 2:9).

“En dit is die oordeel: dat die lig in die wêreld gekom het, en die mense het die duisternis liewer gehad as die lig” (Joh. 3:19).

Baie van die ongeredde mense wat steeds in die duisternis wandel, sluit by kerke aan sonder om waarlik hulle saak met die Here reg te maak. Vormgodsdienstige kerklidmate sal nie onbepaald hiermee wegkom nie, want die Here sal sy dorsvloer deur en deur skoonmaak en die kaf met onuitbluslike vuur verbrand (Matt. 3:12). Die skeiding tussen die ware en valse gelowiges vind by die wegraping plaas. Vir die een groep breek die lig van ‘n nuwe dag aan, en vir die ander groep word dit nag.

Wanneer die uur van die duisternis in die verdrukking aanbreek en die mens van sonde geopenbaar word (2 Thess. 2:3-11), kry die koninkryk van die duisternis mag om ‘n skrikbewind oor die onbekeerde mensdom te voer. Dan sal daar weer gesê kan word: “Dit is julle uur en die mag van die duisternis” (Luk. 22:53).